Usa nga naabot han SeRVisyo Caravan han gobyerno probinsyal han Sinirangan Samar nga pinangunahan ni Gov. RV Evardone an Brgy. Agsaman ha bungto han Jipapad dida han Martes, Hulyo 7, 2026.
Ha nasabi nga caravan, mapinasalamaton nga nakabenepisyo hi Santas Godes Pajares, 71 anyos, nga may tulo nga anak.
Nagkarawat niya an libre nga mga taramnun nga liso hin utanon ngan ginkahituman nga hiya in nagpacheck-up han iya allergy ha mata ngan nakatagamtam pa hiya hin libre nga medisina.
Ha luyo nga hiya in senior citizen na, 15 anyos na nga ira pakabuhi an pag-uma, pag-garden ngan nangangalayon o nagpapasuhol hira hin pagdalos o paghawan.
Hiya in mapinasalamaton nga an ira barangay, bisan hirayo ngan makuri maabot, napili nga pagserbisyuhan pinaagi han SeRVisyo Caravan.
“Ada kay salamat kan gobernador kay waray kami kalimte ngan iya pa kami kinanhi nga mayda bulig,” an mensahe ni Nanay Santas.
An SeRVisyo Caravan nagpapamatuod nga an serbisyo han gobyerno in waray pili kundi para han ngatanan nga komunidad nga nanginginahanglan hin bulig. (JDM-GBP)
