Nag-courtesy call kan Gov. RV Evardone an delegasyon han Regional Juvenile Justice and Welfare Committee (RJJWC) Region VIII, kun diin ginhisgutan an mga programa, serbisyo, ngan pasilidad para ha children in conflict with the law.
Naging sentro han ira pag-istorya an monitoring visit ha mga detention, jail ngan penal facilities, pati na ha Bahay Pag-asa, Rehabilitation Center for Youth, ngan iba pa nga youth care facilities ha probinsya.
Ginhisgutan liwat an pagpatuman han local juvenile intervention and welfare plan ngan an mga kinahanglanon ha pagparig-on han mga serbisyo para ha kabataan nga aada ha conflict with the law.
Usa han importante nga ginhisgutan kun paano magiging operational an Bahay Pag-asa ha Sinirangan Samar, upod an mga pasilidad ha Borongan City, Oras ngan Dolores kaupod hini an training ngan capacity-building han mga staff.
Gintagan liwat hin duon an panginahanglan hin husto nga construction design ngan koordinasyon han mga local ngan nasyonal government units, ngan mga national government agencies basi masiguro nga magiging kwalipikado ngan epektibo an pasilidad para ha mga kabataan.
Prayoridad nga parig-onon an mga programa nga nakasentro ha rehabilitasyon, proteksyon, ngan re-integrasyon han mga kabataan, imbes nga punishment, basi mahatagan hira hin ikaduha nga higayon ngan maupay nga direksyon ha kinabuhi.
Samtang, nagpasalamat hi Gov. Evardone ha padayon nga suporta han Regional Juvenile Justice and Welfare Committee ngan ha pagpatuman han mga programa para ha juvenile justice and welfare.
Dida han courtesy call, tinambungan an delegasyon nira Leo Nito L. Caliber, Social Welfare officer III han RJJWC VIII; Atty. Peter Daniel Bugtas, CPA ngan Atty. Nat King Coles han Public Attorney’s Office; Myles Precielle G. Dequilla han DILG; Brenda Aurora P. Basada han Provincial Social Welfare and Development Office; JO1 Ralf Buna han BJMP; Police Captain Razmia A. Alico, chief han Women and Children Protection Desk han Eastern Samar Police Provincial Office; ngan Ronald Talaogon, program operations manager han Plan International Pilipinas-Eastern Samar. (JDM-GBP)
