Opisyal na nga iginlunsar an regional measles-rubella supplemental immunization activity han Department of Health ha pakikipagsumapayan han Provincial Health Office, gobyerno probinsyal han Sinirangan Samar, lokal nga panggobyernuhan han Dolores, ngan RHU Dolores yana nga adlaw, Agosto 10, 2026, ha Dolores Boulevard Gymnasium.
An Ligtas Tigdas in usa nga nationwide vaccination activity nga ginbubuhat kada tulo katuig para han kabataan nga 6-59 months old, bisan kon kompleto na an ira regular nga bakuna o regardless han ira vaccination status para matagan hin dugang nga proteksyon an mga kabataan kontra measles-rubella o tigdas hangin.
Kun papabay-an nga wara bakuna an bata, an tigdas hangin in pwede magkawsa hin kasakit ngan pagkamatay han bata.
Ha iya mensahe, gin-aghat ni DOH VIII Regional Director Dr. Exuperia B. Sabalberino an mga kag-anak ngan legal guardians nga magpartisipar han programa pinaagi ha pagpabakuna han ira mga anak.
Subay ha iya, importante an pakigbahin han tagsa nga pamilya, para makab-ot an 95 percent vaccination coverage ha probinsya agud maiwasan an pagsasarang han nasabi nga sakit ha bug-os nga komunidad.
Nagpatapod naman hi Board Member Atty. Byron Suyot, committee chair on health ngan representante ni Gov. RV Evardone han pagkomiter han probinsya han programa.
Iya gintagan hin duon an importansya han pagkakaurusa han ngatanan nga ahensya tikang ha DOH ngada han mga LGUs ngan municipal health offices ha pagsiguro nga tanan nga kabataan in mahatagan hin panangga kontra han virus.
Kadungan han measles-rubella vaccine an vitamin A supplementation, nga regular nga ginhihimo kada unom ka bulan.
Durante han launching ha bungto ha Dolores, nakapagbakuna an DOH, ngan RHU hin 80 nga kabataan ngan nagtatarget makapamakuna hin purlomenos 200 ha sakob han usa ka adlaw.
Magkakamay-ada liwat vaccination ha iba pa bungto ha bug-os nga bulan han Agosto para maabot an target immunization han 44,461 nga kabataan ha probinsya.
Presente han aktibidad hira Dolores Mayor, Dr. Zaldy Carpeso; Provincial Health Officer Dr. Marian Epifania Isiderio; DHO Assistant Regional Director Dr. Jean-Marie Egargo; Municipal Councilor Joseph Albert Rivera; ngan Municipal Health Officer Dr. Rowie Romuar. (SEJ)
