Nagin manilampuson an pagpatuman han blood donation drive ngan libre nga dental services kabahin han pagselebrar han Linggo ng Kabataan yana nga Agosto 10 ha Provincial Capitol Gym.
Ha ilarom han “Dugo Mo, Paglaum Ko” youth-led blood donation drive, gintagan hin higayon an mga boluntaryo nga partisipante nga makapagdonar hin dugo para ha mga nanginginahanglan.
Samtang, naghatag liwat hin libre nga dental consultation, oral examination, tooth extraction, ngan oral health education pinaagi han programa nga “Raising Values for Healthy Smiles: Empowering Youth Through Dental Health Services and Oral Health Education.”
An nasabi nga mga aktibidad ginpangunahan han gobyerno probinsyal ha ilarom han liderato ni Gov. RV Evardone pinaagi han Provincial Youth Development Office, kaupod an Office of the Sangguniang Kabataan Federation.
Nakigbahin liwat ha pagpatuman han mga aktibidad an Eastern Visayas Medical Center, Philippine Red Cross-Eastern Samar Chapter, Provincial Health Office, Eastern Samar Provincial Hospital ngan City Health Office.
Pinaagi hini nga mga programa, ha boluntaryo nga pagdonar hin dugo, may kinabuhi nga posible matalwas; ha kada serbisyo medikal, may mga problema ha panlawas, sugad han oral health, in natatagan hin atensyon. (TAC)
