Padayon nga suporta an natatagamtaman han 410 nga mga Isang Propesyonal, Isang Pamilya Program (IPIPP) scholars tikang ha ESSU campuses ha Sur ngan ha gawas han probinsya.
Lakip hini an ESSU Salcedo nga may 180 nga benepisyaryo, ESSU Guiuan nga may 202 nga mga scholar, ngan ESSU Balangiga ngan iba pa nga mga eskwelahan ha gawas han probinsya nga may 28 nga mga scholar.
Ginbuhat an distribusyon han allowance nga nagkakantidad hin ₱9,000 para han tulo ka bulan tikang Enero ngada Marso, samtang ha masunod nga duha ka semana makakarawat pa an mga scholar hin dugang nga ₱6,000 nga allowance para han mga bulan han Abril ngan Mayo.
Duro an kalipay han mga scholar tungod han husto nga panahon han pagkarawat han ira mga allowance, labi na an mga graduating student nga damu an ginagasto para han pag-andam han ira graduation.
An payout ginpangunahan han IPIPP program in-charge nga hi Mannie Arago, kaupod an mga tinaglawas han Provincial Treasurer’s Office. (TAC-GBP)
