Nagdumara an Sangguniang Panlalawigan han Eastern Samar hin public hearing agud pag-iristoryahan an duha nga ordinansa nga may panuyo nga maprotektaran an lokal nga ekonomiya ngan mulopyo han probinsya tikang hin mga gin-aatubang nga isyu, sugad han krisis ha gasolina ngan pagkadisturbo han supply chain.
Ha pangunguna ni Board Member Atty. PJ Evardone, an sesyon in tinambongan han mga myembro han Sangguniang Panlalawigan, upod hira Board Members Timmy Campomanes, Atty. Byron Suyot, Jun Quilitano, Atty. Pearl Evardone, Christelle Yadao, Gigi Zacate, Irvin Pormida, ngan Vice Governor Maricar Sison-Goteesan, kaupod an mga representante tikang ha magka-iba-iba nga ahensya han gobyerno sugad han DTI, OPAS, DENR, ESAMELCO, sektor han transportasyon, academe, ngan iba pa nga mga stakeholders.
Nakasentro an iristorya han Eastern Samar Economic Resilience and Fuel Shock Mitigation Ordinance ngan Renewable Energy Promotion Ordinance of Eastern Samar nga ginproponer ni BM Evardone.
Sakob han Eastern Samar Economic Resilience and Fuel Shock Mitigation Ordinance an pagtukod hin usa nga Provincial Economic Resilience Council nga magbabantay han pagbabag-o ha lagay han ekonomiya ha probinsya ngan magkokoordinar para han stabilization hini.
Nagmamando gihapon ini nga ordinansa hin digital price monitoring system para han mga papliton ngan naghahatag hin kaangayan nga ayuda para han mga sektor han agrikultura, transportasyon, ngan pakabuhi kun inkaso mag-umento an presyo han gasolina.
Kasumpay hini, iginduduso liwat an Renewable Energy Promotion nga ordinansa para han probinsya Sinirangan, usa nga nakikit-an nga pitad han sanggunian para mabaton an problema dara han pagsarig ha mahal nga imported nga gasolina.
Sakob hini an “Green LGUs Program,” nga nag-oobligar nga diri mamenos ha 30 porsyento han enerhiya nga ginagamit han mga building han probinsyal nga gobyerno an tikang ha renewable sources antes an tuig 2030. Dugang pa, nagtatagana ini hin mga insentibo sugad han tax discounts, paspas nga pagproseso hin permit, ngan mga subsidiya para ha mga proyekto nga naggagamit hin renewable energy.
May katuyuanan ini nga makapag-establisar hin mga polisiya nga mag-aaghat hin pamuhunan ha solar, hangin, ngan hydro power, panuyo han probinsya nga mapahabubo an baraydan han kuryente han mga panimalay ngan mga negosyo .
Ginkikit-an liwat ini nga makakapag hatag hin mga bag-o nga panarabahuan ha green energy ngan makabulig mapahabubo an polusyon nga dara han pagsunog hin fossil fuels.
