Para kan Lilia Pecayo, 76 anyos, ngan Perlita Magtulis, 70 anyos, an pag-atubang han sakit ngan kaluya han lawas in bahin na han ira adlaw-adlaw nga sakripisyo ha Brgy. San Roque, usa nga tay-aw ngan panalugon nga komunidad ha bungto han Jipapad.
Tungod han ira lokasyon, hirayo hira dire la ha aspeto han distansya, kundi pati han mga ginkikinahanglan nga serbisyo panlawas ngan medikal nga atensyon.
Kinahanglan nira mamasahe hin P50 para ha sarakyan pan-salog. Kon mababaw naman an tubig, napipiritan hira magbaktas hin usa ka oras ngan tunga, pero kon mauran ngan malagay naman, naabot ini hin duha ka oras.
Tungod hini nga kakurian ngan kawaray han sarakyan, nasarig nala anay hira ha mga herbal nga medisina basi mapahupay an ira mga inaabat.
Hi Nanay Lilia, nga nagtatanum hin bilanghoy ngan kamote para mabuhi, in maiha na nga nag-aantos han pagsuol han iya siki.
Kundi ha pagsulod han SeRVisyo Caravan, nakakarawat hiya hin libre nga check-up ngan mga medisina nga dire na kinahanglan mamasahe o magbiyahe hin higrayo nga distansya.
“Nagpapasalamat ak hin dako nga natagan ak hin mga higayon,” siring niya, dungan han dako nga pasalamat nga waray na hiya magbaktas hiton malagay nga dalan para la magpa-tsekup.
Mapinasalamaton liwat hi Nanay Perlita han mga higayon nga igin-dulog ha ira han gobyerno probinsyal.
Tikang pa han nag-agi nga Abril, sige na an suol han iya ulo pero wara iya kapas magpa-check up dara han gastos ngan kahirayo nira han bungto.
Pero han naglabay nga SeRVisyo Caravan, dako an kalipay ni Nanay Perlita nga hira na mismo an ginduok hin libre nga serbsiyo medikal ngan medisina.
Dugang pa niya, ini an primero nga higayon nga may sugad kadamo nga medikal nga serbisyo an binisita mismo ha ira baryo.
Pinaagi han SeRVisyo Caravan, an kahirayo ngan kakulangan ha transportasyon in waray nagin ulang basi an mga medikal nga serbisyo in mapahirani ha mga nagkikinahanglan.
Sugad kan Lilia ngan Perlita, an caravan in nagserbi nga pagpamatuod nga an gobyerno in andam lumusad ha salog ngan maglakat ha lagay para la makupkop ngan maprotektahan an panlawas han mga senior citizens han San Roque. (SEJ-JDM)
