Nagpaabot hin ₱50,000 nga bulig pinansyal an gobyerno probinsyal han Sinirangan Samar ngadto kan Lolo Juan M. Contado, kadugangan han nakarawat nga ₱100,000 nga tikang ha national government pinaagi han Department of Social Welfare and Development Office.
He Lolo Juan, usa nga centenarian nga na edad hin 101-anyos, in residente han Brgy. Batang, Oras. Kinarawat niya an iya benepisyo dida han Huwebes, Mayo 20, 2026.
Hi Lolo Juan in nagselebrar han iya ika-101 nga kaadlawan han naglabay nga Mayo 15, 2026.
Personal nga gin-abot an bulig han gobyerno probinsyal nga inisyatibo ni Gov. RV Evardone, pinaagi kan Board Member Irvin Pormida, kaupod hi Brgy. Batang Kapitan Lope Nicart, ngan pira nga mga representante tikang ha probinsya.
Ha pakiana kan Lolo Juan kun ano an iya siyahan nga gagastusan han nakarawat nga bulig, binaton hiya hin klaro ngan simple nga baton pinaagi hin senyas’ an “pag-kaon.”
Sumala han iya pamilya, may unom hiya nga anak, ngan yana usa han iya kapamilya an nag-aataman ngan nanginginano para han iya adlaw-adlaw nga mga panginahanglan.
Subay han iya apo, kun may “sekreto man” han iya sugad nga edad, amo an pagkaon hin masustansya ngan an paglikay ha mga bisyo sugad han pag-inom hin makahurubog nga irimnon ngan paninigarilyo.
Hi Lolo Juan in kilala ha ira barangay nga usa nga arisgado nga parag-uma bisan han iya pangidaron nga 95-anyos, nakikita pa hiya nga aktibo ha pag-uuma.
Durante hine nga bulig pinansyal, nakakarawat liwat hiya hin ₱30,000 tikang ha lokal nga gobyerno han Oras kumo syahan nga centenarian han ira barangay. (JDM-GBP)
