An pag luros han bandera han Pilipinas o half-mast ha flag-raising ceremony dida han Lunes, Mayo 11, 2026 in simbolo han pagpasidungog ngan pakiduyog han bug-os nga probinsya han Sinirangan Samar ha pagtalikod ni anay Gov. Clotilde Japzon-Salazar, an syahan nga babaye nga nagserbi kumo gobernador han probinsya.
Usa ini nga higayon paghinumdom ngan pagrespeto ha iya kinabuhi ngan serbisyo publiko nga naghatag dungog ngan inspirasyon ha mga Estehanon.
Hi Salazar in natawo ha bungto han General MacArthur han Enero 14, 1932, nagtapos hiya hin abogasya ha University of Santo Tomas ngan nakapasar ha Bar Examination han 1961. Antes hiya magretiro, nagserbi hiya kumo municipal circuit trial judge ha Guiuan.
Ha panahon nga kadam-an han mga lider politikal ha probinsya in kalalakin-an, nagin makasaysayan an iya pagdaog kumo gobernador han 2001 ilarom han Nationalist People’s Coalition.
Antes hini, nagtikang hiya han iya serbisyo publiko kumo miyembro han Sangguniang Panlalawigan han 1989.
An iya liderato nagin simbolo han kusog, integridad, ngan dedikasyon ha serbisyo publiko, nga nag-abri hin dalan para ha kababayin-an ha larangan han politika ha Sinirangan Samar.
Pinaagi han simple pero makahuluganon nga seremonya han pagluros han bandera o half-mast, nagpapakita an probinsya hin kolektibo nga paghinumdom ngan pasalamat ha usa nga lider nga nagbilin hin dako nga marka ha kasaysayan han Eastern Samar.
Namatay hi Salazar ha edad nga 94 dida han Sabado, Mayo 9, 2026. (JDM)
