Parte han padayon nga paningkamot matagan hin higayon an mga Estehanon nga nakakaeksperyensya hin kakurian ha mobilidad, nagpa-abot an gobyerno probinsyal han Sinirangan Samar ha pangunguna ni Gov. RV Evardone hin wheelchair para han usa nga benepisyaryo ha Brgy. Lupok, Guiuan, Eastern Samar.
Dida han Martes, Abril 7, 2026, nagdul-ong hi Gov. Evardone, kaupod an PGO Guiuan Satellite Office, hin bag-o nga wheelchair kan Antero Daguinod, 75-anyos nga residente han nasabi nga barangay agud mabuligan hiya han iya kakurian pagkiwa.
Hi Tatay Antero in nakaeksperyensya hin kakurian paglakat hin hirayo o maiha tikang pa han edad niya nga 74 tungod han iya sakit nga diabetes ngan prostate.
Ha pagpakiana ni Gov. Evardone kon diin an iya siyahan nga kakadtoon, iya iginpahimanghraw an iya plano nga siyahan nga bibisitaon an simbahan komo usa hiya nga anay lay minister.
