Manilampuson nga ginbuhat an pagpirma han Memorandum of Agreement (MOA) ha butnga han Commission on Population and Development (CPD) Region 8 ngan han gobyerno probinsyal han Sinirangan Samar yana nga Martes, Marso 17, ha PGO Conference Room.
An MOA in nagtutuyo nga maparig-on an kolaborasyon ngan koordinasyon han duha nga ahensya agud mas mapauswag an pagplano, implementasyon, ngan pagmonitor han mga programa ha Population and Development (PopDev) ha probinsya.
Pinaagi hini nga kasabotan, ginlalaoman nga mas magiging organisado ngan epektibo an paghatag hin serbisyo nga may kalabotan ha populasyon, pamilya, ngan komunidad.
Naging mahinungdanon an seremonya han pagpirma tungod han presensya nira Gov. RV Evardone, CPD Region 8 Regional Director Elnora Pulma, CPD Planning Officer I Gerald Gajol, Designated Provincial PopDev Officer June Yodico, ngan Borongan City Population Officer Mark Lucio Cortado, Jr., nga nagpapakita han ira marig-on nga suporta ha nasabi nga inisyatibo.
An MOA in magpapabilin nga epektibo ha sakob hin tulo ka tuig ngan maghahatag hin dugang nga oportunidad para han epektibo nga implementasyon han mga programa para ha kauswagan han katawhan han Sinirangan Samar. (TAC-JDM)
