Nanguna hi Gov. RV Evardone ha pagtalakay han mga pitad han gobyerno probinsyal agud atubangon an problema ha suplay han fuel dida han joint blended meeting han Provincial Development Council (PDC) ngan Provincial Disaster Risk Reduction and Management Council (PDRRMC) nga ginbuhat ha PGO Conference Hall, Lunes, Marso 16.
Sentro han iristorya an nahinanabo nga fuel crisis ha nasud nga may kalabutan ha giyera ha Middle East. Ginhisgutan han konseho an pagmonitor han presyo han fuel ngan pagtipid ha paggamit hini agud masiguro nga mag-iha an suplay ha bug-os nga probinsya.
Usa nga rason han pagkadelatar han suplay amo an load limit nga iginpapatuman ha mga tulay ha Brgy. Coticot, Giporlos ngan ha bungto han Lawaan, nga diri makaagi an dagko nga fuel tanker.
Tungod hini, nagpasa hin resolusyon an konseho nga naghahangyo ha Department of Public Works and Highways (DPWH) nga mapadig-on an nasabi nga mga tulay, basi maprioridad an pag-agi han mga fuel tanker pagsulod nganhi han probinsya.
Nagpahimatngon naman hi Gov. Evardone nga i-review an diri importante nga mga aktibidad ngan kun mahimo i-postpone anay o igbalhin ha online setup agud makatipid ha paggamit han fuel.
Sumala pa han gobernador, kinahanglan an pagburublig, hugot nga koordinasyon, ngan epektibo nga monitoring basi maprotektaran an suplay han fuel ngan ekonomiya han probinsya samtang gin-aabat an global crisis. (JDM-GBP)
