Nagpahimulos an mga miyembro ha sektor han person with disability han libre nga mga serbisyo nga iginhatag pinaagi han medical ngan dental mission nga gin-organisar han gobyerno probinsyal kabahin han selebrasyon han 48th National Disability Rights Week yana nga Hulyo 17 ha Provincial Capitol Gym.
Nakigbahin ha aktibidad an Philippine Statistics Authority (PSA), Provincial Health Office, Eastern Samar Provincial Hospital, ngan Department of Health ha paghatag hin nagkakalain-lain nga serbisyo para ha mga PWD.
Upod han mga serbisyo nga ginpahimulusan han mga benepisyaryo amo an pag-update han PWD records ngan ID pinaagi han PSA, libre nga medical check-up, dental consultation ngan tooth extraction, ngan pagpanhatag hin libre nga mga medisina.
Pinangunahan han Provincial Persons with Disability Affairs Office (PPDAO) an aktibidad ha pangunguna ni PPDAO President Hendrick Dacuyan.
An medical ngan dental mission in usa han mga aktibidad nga kabahin han selebrasyon han National Disability Rights Week ha probinsya, nga nagpapakita han padayon nga koordinasyon han nagkakalain-lain nga ahensya han gobyerno ha paghatag hin dekalidad nga serbisyo ha mga persons with disabilities (PWDs) ngan ha pagpasidungog han ira katungod ha patas nga pagtratar, accessible nga serbisyo, ngan aktibo nga partisipasyon ha komunidad. (TAC-GBP)
