“Akay buotan nagseserbisyo gud hiya ha iya posisyon, nagtitiyaga hiya bisan harayo nga mga lugar.” an sagbang ni Nanay Lilia ha pakiana kun ano an ira masusugad han ira nakita nga SeRVisyo Caravan ngan kan Gov. RV Evardone.
Kumo sayod an mag-asawa ngan personal nira nga kinita salit sugad nala an ira pagpa-abot hin pasasalamat kan Gov. Evardone ngan ngada han ngatanan nga kaupod han SeRVisyo Caravan.
Ha ikaduha ka adlaw han SeRVisyo Caravan ha bungto han Jipapad, ha Brgy. San Roque ngan Cagmanaba, usa hi Nanay Lilia Magtulis Doroques nga nakabenepisyo pinaagi han pagpakyaw han ira bote para han paghatod han programa.
“Waray gad masubong haak dara hit ak experience kay usa manla ak nga babayi nga nag-kakandulong, tiyaga la.”
Ha luyo han peligro ngan kakurian han pagbiyahe ha salog han Jipapad, padayon an pagtúkon ha agos han kinabuhi hi Nanay Lilia, 49 anyos, residente han Brgy. San Roque, Jipapad, para masuportahan an iya pamilya.
Kaupod an iya asawa kumo makinista nga hi Lucas Capoquian Doroques, 50 anyos, may lima hira nga anak, lakip an usa nga PWD nga naputol an siki tungod hin aksidente ha trabaho.
Ha sulod hin walo ka tuig, an pamasaheros gamit an boté an ira pakabuhi. Nag-boundery hin bote ngada han paka-kalugaringon, waray permanente nga kita pinaka-dako na an P400 kada adlaw samtang labot pa nga nagtitikamahal an presyo han diesel.
“Bisan baha dako an tubig na biyahi dara han kuri bisan pa abot han tubig an Jipapad. Kay waray man iba.”
Nag-uusahan nga babayi nga namamanulong ha ruta han San Roque ngan Cagmanaba, usa han pamasaheros ngan pag-sundo ha mga maestro, maestra ngan bisan pa ha mga emergency ha komunidad.
“Darapiton kami hit nga mga emergency kay kami man la an nadadali-dali… Ah sandurungan mabutlaw piro okay la nag sa-sacrifice bisan makuri basta para hit pamilya mabuhi la.” (JDM-ARV)
