Ha padayon nga pagsuporta ha mga parag-uma han probinsya, iginpakita han Department of Agriculture Regional Field Office 8 (DA-RFO 8) ha mga Estehanon an makabag-o nga teknolohiya ha pag-uma hin humay pinaagi han Rice Derby 2026 (Season 5) nga ginpatuman dida han Hulyo 15 ha Brgy. Gap-ang ngan Brgy. Jicontol, bungto han Dolores.
An Rice Derby nagtutuyo nga ipakita ha mga parag-uma an epektibo nga paggamit han moderno nga teknolohiya ngan iba-iba nga pamaagi ha produksiyon hin humay agud mapauswag an ani ngan maparig-on an sektor han agrikultura ha probinsya.
An programa ginpatuman pinaagi han pagkigbinuligay han Department of Agriculture, han gobyerno probinsyal ha pangunguna ni Gov. RV Evardone, ngan han local government unit (LGU) han Dolores ha liderato ni Mayor Zaldy Carpeso.
Pinangunahan an aktibidad han mga tinaglawas han Office of the Provincial Agricultural Services, kaupod an mga opisyal han DA-RFO 8 ngan han Dolores LGU.
Gintikangan an programa durante han dry season cropping han Mayo ngan matatapos ha Oktubre hini nga tuig.
Ginlalauman nga an Rice Derby Field Day in maghahatag hin higayon ha mga parag-uma nga makita mismo an mga resulta han paggamit han makabag-o nga teknolohiya ngan mga bag-o nga pamaagi ha pagtanom hin humay, nga makakabulig ha pagpauswag han ira produksiyon ngan panginabuhi. (TAC-JLC)
