An hadto ambulance driver nga hi Jose Neil Aludo, 52 anyos nga residente han Barangay Abucay, Sulat, nag-aantos han sakit nga osteoarthritis ha sulod han naglabay nga duha ka tuig, nga nagdara hin adlaw-adlaw nga kakurian ha iya panginabuhi.
Aktibo nga nagserbisyo ha gobyerno kumo usa nga ambulance driver in yana makuri na makalakat. Usahay, nawawarayan hiya kusog ha tuhod nga nagreresulta ha iya pagkatumba.
Tungod han iya kahimtang, nawara an iya kapasidad ha pagtrabaho, nga nakaapekto ha panginabuhi han ira pamilya. Yana, nasarig hira ha benepisyo tikang ha Pantawid Pamilyang Pilipino Program (4Ps).
Bisan han kakurian, padayon nga nagigin inspirasyon an iya mga anak—usa an bag-o la nagtapos nga cum laude ha kurso nga education, samtang an usa napiritan umudong ha pag-eskwela ngan nag-eextra trabaho basi makabulig ha pamilya.
“Ayaw anay pagdungan, hi im ate anay it ma-eskwela,” siring ni Tatay Jose han panahon nga diri na niya kaya sustentaran an pag-eskwela nira ngatanan.
May mga higayon nga nangangaro an iya anak hin kasayuran kon kay ano nga diri pa hiya makakapadayon ha pag-eskwela, pero tungod han kahimtang han pamilya, napiritan hi Tatay Jose nga karawaton an kakurian samtang naglalaom hin mas maupay nga kabubuwason.
Han personal nga pagbisita ni Gov. RV Evardone ha ira panimalay, yana nga Hunyo 3, napamatian niya an kahimtang han pamilya Aludo.
Iginhatag han gobernador an wheelchair nga ginkikinahanglan ni Tatay Jose basi mapasayon an iya paggi-os ngan makagawas-gawas ha ira panimalay.
“Maupay, Gov., kay nagpepersonal ka paghahatag,” siring ni Tatay Jose nga puno hin pasalamat.
Han napamatian ni Gov. Evardone, an kahimtang han ira pamilya, labi na an bahin han edukasyon han iya mga anak, naghatag hiya hin paglaom pinaagi han scholarship assistance para ha usa han mga anak ni Tatay Jose.
“An usa ig-scholar ta ha probinsya para makatangpos,” siring ni Gov. Evardone.
Yana, an usa nga anak ni Tatay Jose nga nakatangpos na ha education nga kurso, in nagre-review ha Borongan para ha board examination.
Iginpaabot liwat han gobernador nga mag-aplay ha Bulig Para Estudyante Review Assistance Program basi makabulig han iya mga garastusan.
Bisan han ngatanan nga ira gin-aantos, usa la an hingyap ni Tatay Jose. “Mahuwasan la unta ako para makapagtrabaho liwat kay may-ada pa ako mga estudyante,” siring niya.
Han pakianhan ni Gov. Evardone kon diin an siyahan niya nga bibisitahon pinaagi han iya bag-o nga wheelchair, malipayon nga binaton hi Tatay Jose nga karuyag niya kumadto ha LGU Sulat ngan ha plaza, mga lugar nga maiha niya nga ginsirbihan samtang aktibo pa hiya ha trabaho. (TAC-JDM)
