Personal nga igindul-ong ni Gov. RV Evardone an bulig pinansyal ngadto han mga pamilya nga biktima han sunog ha Lawaan dida han Marso 18.
Tulo nga pamilya tikang ha Barangay 8 ngan usa nga pamilya ha Barangay 10 an nakarawat han ayuda nga nagkakantidad hin ₱25,000 kada pamilya.
Sumala han mga biktima, totally damaged an ira mga panimalay, samtang an iba nga nahitura nga mga kagamitan in diri na gud magagamit.
Yana, an mga biktima naghimo anay hin temporaryo nga payag samtang an iba naman in nakiukoy la anay ha ira mga kapamilya.
Sumala kan Nanay Annaliza Peñaz, usa han mga biktima ha Barangay 8, an ira makakarawat nga assistance tikang ha gobyerno probinsyal in igpapalit nira hin mga materyales para makapagtigdong utro hin balay, lakip na an pagpalit hin kahoy para mahimo hin dibisyon han mga kwarto para ha ira mga anak.
Ginkompirma nga kuryente an gintutuohan nga hinungdan han sunog nga nahitabo pasado alas-10 han gab-i samtang nangangaturog an mga residente. Usa nga bata nga anak ni Nanay Annaliza an nakapansin han kalayo nga amo an nakapag-sumat ha ira.
Nagpahayag naman an mga biktima han ira hul-os nga pagpapasalamat han madagmit nga aksyon nga ginbuhat han gobernador.
Kaupod ni Gov. Evardone ha paghatag han bulig an mga opisyales han bungto han Lawaan ha pamunuan ni Mayor Athene Mendros, Vice Mayor Ravi Parker Inciso, ngan mga miyembro han Sangguniang Bayan. (TAC-GBP)
