Mahinungdanon nga gindumara an duha ka adlaw nga orientasyon ngan examinasyon para han libre nga two-day theoretical driving course nga pinangunahan han gobyerno probinsyal han Sinirangan Samar pinaagi han Provincial Public Employment Service Office (PESO) kasumpay an Land Transportation Office (LTO) Dolores dida han Abril 27-28, 2026 ha Municipal Gymnasium Brgy. 10, bungto han Dolores.
An LTO Dolores District Head nga hi Gavino Anacio, kaupod an mga LTO instructors, an naggiya o nagtutdo ngan gintagan nira hin duon nga an lisensya in dire usa nga right, kundi ini in usa nga prebelihiyo hin usa nga motorista.
Dugang pa, ini nga kinaadman in maghahatag ha usa nga motorista hin mas haluag nga panlantaw ha mga balaodnon ha trapiko.
Nahimugso ini nga inisyatibo tungod han panalimbasog han gobyerno probinsyal nga maaghat ha pagkuha hin lisensya ngan hibaro an mga motorista ha mga balaudnon ha trapiko, safety driving ngan basic maintenance ha ira mga sarakyan.
An mga partisipante nga makakapasar han examinasyon in makakakarawat hin theoretical driving course certificate tikang ha LTO nga usa ha mga requirements ha pagkuha hin student license.
An aktibidad in gintambungan hin mga partisipante tikang ha northern municipalities han Sinirangan Samar nga nagregister ha online nga ginpasamwak ha social media han PESO Eastern Samar ha mga nakalabay nga semana, amo an Taft (13), Can-Avid (26), Dolores (80), Maslog (16), Oras (63), ngan San Poli (21)—Suma total hin 219 ka indibidwal. (GBP)
