Kataliwan han 6.0 nga linog nga inabat ha bug-os nga probinsya han Sinirangan Samar, dayon ginbuhat an rapid visual assessment ha Eastern Samar Provincial Hospital han mga tinaglawas han Provincial Engineering Office ha mando ni Gov. RV Evardone dida han Mayo 5, 2026.
Pinangunahan nira Engr. Reymond Bajado, Brandon Abenis, Brian Zeus Dala, Ian Jake Evardone ngan Robert Jay Basada an nasabi nga assessment agud masiguro an seguridad ngan kaandaman han ospital, usa han pinaka-importante nga pasilidad ha paghatag hin serbisyo medikal ha publiko.
An epekto han linog sugad han hairline cracks ha mga pader, kisame, ngan iba pa nga architectural nga parte in pinanginanuan o gin tagad nga bangin magpakita hin posible nga structural nga problema.
Ini nga inisyatibo nagpapakita han padayon nga paningkamot han probinsya ha pagpanalipod han publiko ngan ha pag-andam ha mga kalamidad, agud masiguro nga an ngatanan nga importante nga pasilidad nagpapadayon nga himsog ngan operasyonal katapos han mga kalamidad sugad han linog.
Padayon nga ginmomonitor an kahimtangan, kaupod an resulta han mga aftershocks, ngan magpapatuman hin kaangayan nga mga aksyon o pag-repair han istruktura kun pagkikinahanglanon. (JDM)
