Sumatotal 2,281 nga pamilya tikang ha Poblacion 1, Poblacion 2, Poblacion 3 ngan Malaintos ha bungto han Dolores an nakakarawat hin 10 kilos nga bugas kada pamilya ha ilarom han Local Government Support Fund rice distribution program nga ginbuhat yana nga Agosto 12 ha Malaintos Gymnasium, Dolores.
An programa kabahin han “Bawat Bayan Makikinabang” ha ilarom han administrasyon ni President Ferdinand Marcos Jr.
Para ha bungto han Dolores, P5 milyon an igin-alotaga nga pondo tikang han nasyonal nga gobyerno para han implementasyon han programa.
Tikang ha upat nga barangay nga benepisyaro, 342 nga pamilya an tikang ha Poblacion 1, 1,310 ha Poblacion 2, 142 ha Poblacion 3, ngan 486 ha Malaintos.
Sumala kan Mayor Zaldy Carpeso, diri igo o sakto an pondo basi mahatagan an ngatanan nga pamilya.
Ha siyahan nga plano, nagpili hira hin bulnerable nga sektor sugad han PWD, senior citizens, BHW, barangay tanod, ngan mga driver nga magigin benepisyaryo tungod han limitado nga pondo.
An suhestyon hi Gov. RV Evardone nga matagan an tagsa-tagsa nga pamilya basi malikyan an posible nga problema ha pagpili hin limitado la nga benepisyaryo.
Tungod hini, naghatag hin kadugangan nga pondo an gobyerno probinsyal, dugang ha P5 milyon nga alokasyon tikang ha nasyonal nga gobyerno, basi matuman nga masahid an kada pamilya matagan hin napulo ka kilo nga bugas. (TAC-JDM)
