28 nga mga pedicab drivers tikang ha bungto han Sulat an opisyal nga nakagtag-iya hin libre nga mga electric tricycles (e-trikes) pinaagi han E-trike Livelihood Support Program han lokal nga panggobyernohan han Sulat ha pangunguna ni Mayor Javier Zacate han Hulyo 30, 2026.
Ini an pinakasyahan nga inisyatibo ha sakop han probinsya han Eastern Samar nga direkta nga naghatag hin e-trikes para ha tsuper.
An nasabi nga programa in may panuyo nga maghatag hin mas madali, moderno, ngan mas bastante nga buhay-buhay ha pedicab drivers.
Durante han gindumara nga blessing ngan launching, nagpaabot han iya pasalamat hi Manuel Assistio, presidente han Sulat Pedicab Drivers Association.
Ha iya mensahe, ginkilala niya an dako nga kalibutan nga mababag-o ha ira adlaw-adlaw nga pamamasada.
“Nagpapasalamat kami han higayon nga iyo kami nabuligan han amon buhay-buhay,” siring ni Assistio. Dagdag pa niya, subay ha bag-o nga e-trike, mas magmamadako na an ira income ngan dire na mabutlaw an ira panlawas kumpara ha adlaw-adlaw nga pagpadyak han pedicab.
Agud masiguro nga dire-diretso an pakabuhi ngan pag-karga hin kuryente, magbubutang an LGU hin solar panels ha kada e-trike ngan magbubutang liwat hin mga opisyal nga charging stations ha bungto nga magagamit pan-charge, labi na kun mauran ngan kulang an sirak han adlaw.
Para naman mas damo pa nga mga driver an makapahimulos han nasabi nga oportunidad,
nagkomiter hi Gov. Evardone hin kadugangan nga pondo tikang ha gobyerno probinsyal para ha dugang nga mga e-trikes agud matagan liwat an iba pa nga mga pedicab drivers ha Sulat. (SEJ-GBP)
