Ha pagpadayon han ikaduha nga adlaw han gindudumara nga Serbisyo Caravan, iginpahirani han gobyerno probinsyal han Sinirangan Samar ha pangunguna ni Gov. RV Evardone an mga serbisyo han gobyerno ha mulopyo han isla han Tubabao ha Guiuan.
Ini in kaparte han pagsalin-urog han siyahan nga tuig han pagpuruko ni Gov. Evardone komo gobernador.
An nasabi nga programa nakaserbi hin may kabug-osan nga 2,240 nga residente tikang ha lima nga barangay. Kalakip hini an 586 nga benepisyaryo tikang ha San Pedro, 557 tikang ha San Juan, 477 tikang ha Trinidad, 428 tikang ha Camparang, ngan 192 tikang ha San Antonio.
Sakob hini nga programa, gindara hin direkta ha komunidad an mga importante nga serbisyo publiko sugad han libre nga check-up pan-medikal, libre nga medisina, pangiho, bulig ha pan-agrikultura, libre nga legal advice, social services, ngan iba pa.
Labot pa han caravan, iginpahibaro gihapon ni Gov. Evardone an paglunsad han programa nga Kapitolyo sa Barangay, usa nga inisyatibo nga gindisenyo para regular nga mapadangat an mga serbisyo han gobyerno probinsyal ngadto mismo ha mga harayo nga komunidad, agud makakarawat hin ginkikinahanglan nga bulig an mga taga isla nga di na kinahanglan magbiyahe hin harayo ngadto ha kapitolyo.
Presente gihapon pagsuporta han programa hira Congressman Sheen Gonzales, Vice Governor Maricar Sison-Goteesan, ngan an mga Board Members han ikaduha nga distrito.
