Opisyal nga gin-turn over han gobyerno probinsyal an bag-o nga road concreting project ha Brgy. Camada-Brgy. Maytigbao road hadton Hunyo 3.
Ginpangunahan ni Gov. RV Evardone an seremonya, kaupod an mga opisyales han duha nga barangay ha pamumuno nira Kapitan Ruby Dañas han Brgy. Camada ngan Kapitan Fernando Operario han Brgy. Maytigbao.
An proyekto may kabug-usan nga pondo nga ₱5 milyon, nga may kahilaba nga 227 metros ngan lima ka metros an kahalapad.
Ini nga kalsada ginlala-uman nga maghahatag hin mas maupay nga akses ngan mas komportable nga pagbiyahe para han mga residente.
Durante han seremonya, ginpahibaro han gobernador nga magpapadayon yana nga tuig an Phase 2 han konstruksyon han covered court ha Brgy. Maytigbao.
Iginkonsiderar liwat han gobyerno an mga hangyo ngan plano han mga barangay para ha masunod nga mga tuig.
Ha Brgy. Maytigbao, upod han mga plano an pagkumpleto han lima ka kilometro nga kalsada ngan pag-instalar hin solar street lights basi mas masiguro an katalwasan ngan mas maupay nga transportasyon labi na ngin gab-i.
Ha Brgy. Camada naman, may plano liwat para ha pag-instalar hin street lights yana nga tuig. Para ha masunod nga tuig, target an pag-upgrade han covered court, pagbutang hin stage, ngan pag-renovate han mga konkreto nga purok-anan ha plaza para ha mas maupay nga gamit han komunidad ha mga aktibidad. (TAC-JDM)
