Igin-turn over han gobyerno probinsyal, ha pangunguna ni Gov. RV Evardone, an nahuman na nga proyekto nga farm-to-market road (road concreting) ha Brgy. Casuroy, San Julian, dida han Hunyo 3.
An nasabi nga kalsada may kahilaba nga 111.83 metros ngan kahalapad nga lima ka metros, nga may kabug-usan nga pondo nga P1.67 million.
Dako nga higayon ini para han mga molupyo han Brgy. Casuroy tungod kay amo ini an syahan nga barangay ha San Julian nga personal nga ginbisita han gobernador.
Malipayon naman nga ginkarawat han mga opisyales ngan residente han barangay an nasabi nga proyekto.
Ha iya madaliay nga pagbisita, iginpasabot han gobernador nga andam an gobyerno probinsyal nga maghatag pa hin usa nga prayoridad nga proyekto para han barangay.
Samtang, iginrekomenda han mga opisyales han barangay an pagpahitaas han usa pa nga kalsada nga gin-aagian han mga estudyante pakadto ha ira eskwelahan.
Sumala ha ira, usa nga parte han barangay an pirmi nalalabon hin tubig labi na kon tagdaragko an tubig-dagat, problema nga maiha na nga gin-aantos han mga residente.
May mga higayon pa ngani nga kinahanglan pas-anon o kargahon han mga kag-anak an ira mga anak basi la makatalabok ngan makaeskwela hin ligtas.
Iginrekomenda liwat han barangay an pagkalsada han dalan tikang ha Sitio Layog pakadto han elementarya nga eskwelahan basi masiguro an mahimyang ngan mas komportable nga pagbiyahe han mga estudyante.
Ginbaton naman ini han gobernador pinaagi han pag-aghat ha mga opisyales nga magpasa hin resolusyon basi madali nga maproseso ngan maipatuman an nasabi nga proyekto. (TAC-JDM)
