Pormal nga ginbuhat an turn-over ceremony han rehabilitation/reblocking han San Isidro ngan Sto. Tomas Road ha Sulat dida han Hunyo 3.
Pinangunahan ni Gov. RV Evardone an nasabi nga seremonya, kaupod ni Sulat Mayor Javier Zacate ngan mga opisyales han Brgy. San Isidro ngan Brgy. Sto. Tomas.
An proyekto naglalakip hin rehabilitasyon ngan reblocking han dalan nga may sukol nga 3,389.75 sq meter.
Durante han seremonya, malipayon nga gin-anunsyo ni Gov. Evardone nga may igindugang nga pundo yana nga tuig para han padayon nga road concreting project ha nasabi nga kabaranggayan.
Ha iya pakighimangraw ha mga opisyales han duha nga barangay, ginpakianhan han gobernador kon ano pa nga mga proyekto an kinahanglan ngan karuyag nira tagan hin prayoridad.
An nasabi nga mga proyekto kabahin han padayon nga paningkamot han gobyerno probinsyal ha paghatag hin mga programa ngan serbisyo nga makakabulig ha pag-uswag han mga komunidad ha bug-os nga probinsya. (TAC-JDM-RCS)
