Ginkilala an tulo nga local government units ha Eastern Visayas durante han Walang Gutom Awards han Department of Social Welfare and Development (DSWD) nga gindumara dida han Mayo 12, 2026.
An mga ginpasidunggan nga mga LGUs tikang ha Leyte amo an Palompon ngan Baybay City, samtang nag-uusaan naman an bungto han Arteche tikang han probinsya han Sinirangan Samar.
An Arteche, matapos makasulod ha Top 10 Outstanding Anti-Hunger Initiatives Nationwide pinaagi han ira One Barangay, One Gulay Program, in nakakarawat hin ₱2 million nga grant tikang ha DSWD kun diin ini in personal nga ginkarawat nira Arteche Acting Mayor Roland “Boie” Bowad Evardone ngan Municipal Agriculturist Antonio Luceres Jr.
Iginpresentar ni Evardone ha mga hurado an programa nga nakatutok ha backyard ngan community gardening agud mapakusog an food security ngan masiguro nga may masustansya ngan accessible nga pagkaon ha kada barangay.
Panuyo han One Barangay, One Gulay Program nga mapabaskog an mga pamilya ngan komunidad pinaagi han pagtanom hin mga utanon, masiguro nga may-ada makuha nga masustansya nga suplay hin pagkaon, samtang gin-aaghat an aktibo nga partisipasyon han komunidad.
Ini nga inisyatibo nagin usa nga modelo han pagburublig han mga lokal nga gobyerno, mga opisyal han barangay, mga parag-uma ngan han mga mulupyo.
An Walang Gutom Awards in usa nga inisyatibo han DSWD ngan han Galing Pook Foundation ha suporta ni Pangulong Ferdinand R. Marcos Jr. para ha usa nga hunger-free Philippines. (JDM)
