Ha padayon nga ungara nga maipaharani an serbisyo ngadto ha mga kabaranggayan, nagkatitirok an iba-iba nga ahensya agud paghiningadayan an syahan nga SeRVisyo Caravan para han tuig 2026.
Pinangunahan ni Provincial Administrator Nelson Cortez an nasabi nga meeting nga ginbuhat ha Sangguniang Panlalawigan Session Hall yana nga adlaw, Mayo 7, agud paghisgutan an preparasyon ngan koordinasyon para han nasabi nga aktibidad.
Nakatalaan nga pagbuhaton an caravan ha bungto han Jipapad ngan Guiuan.
An SeRVisyo Caravan in nagtutuyo nga maihatag an iba-iba nga serbisyo han gobyerno ngadto ha mga komunidad, labi na ha mga residente ha mga hirayo nga lugar, pinaagi han mas episyente ngan organisado nga paghatag hin libre nga serbisyo publiko.
Presente han meeting an mga tinaglawas tikang ha iba-iba nga ahensya ngan opisina sugad han PSA, PVO, DPWH, PLO, OPAS, OWWA, Assessor’s Office, ESPPO, PESO, 502nd IB, 603rd IB, DENR/CENRO, PHO, Provincial Tourism Office, ESAMELCO, PDRRMO, PSWDO, DILG, PCIC, DOLE, DTI, PGSO, PhilHealth, TESDA, Provincial Engineering Office, mga representante tikang ha Congressional Office ngan 4Ps Party-list.
Pinaagi hini nga inisyatibo, ginlalaoman han gobyerno probinsyal nga mas mapakusog an pag-abot han serbisyo publiko ngadto ha mga Estehanon, labi na ha mga komunidad nga limitado an akses ha nagkakaiba-iba nga programa ngan serbisyo han gobyerno.
