An Department of Social Welfare and Development-Eastern Samar, pinaagi han Walang Gutom Program, naglunsar han Walang Gutom Kusinero Cook-off Challenge ha provincial level, ha suporta han gobyerno probinsyal han Sinirangan Samar ha pangunguna ni Gov. RV Evardone, dida han Marso 18, 2026 ha Capitol Gym, syudad han Borongan.
Ini in pinangunahan ni DSWD Community Engagement Coordinator-Team Leader Eastern Samar Cluster 1 Dina C. Desoloc, ka upod hi Rachelle Perez Aboy kumo representante ni Gov. Evardone.
Panuyo han nasabi nga kompetisyon amo an pag-aghat han komunidad nga makahatag ha ira tagsa-tagsa nga pamilya hin masustansya, barato, ngan puno hin nutrisyon nga mga pagkaon.
Naging sentro han kompetisyon an “Go, Grow, ngan Glow” nga nagserbi nga criteria han ira mga gindadasig nga putahe ngan kinahanglan ini in marasa, barato, masustansya, ngan magpakita hin creativity ngan inobasyon ha napili nga putahe.
An mga nagserbi nga board of judges amo hira Vicky Salazar, complaint resolution officer; Ma. Rosyl R. Fernandez, SFO team leader-Eastern Samar; ngan hi Rachelle Perez Aboy.
Ginkilala kumo kampyon an tarukog sisig nga putahe ni Annaliza Rivera tikang ha Salcedo. Nakuha naman an first place han special vegetable lumpia nga putahe ni Lydia Alambra tikang ha syudad han Borongan, samtang an second place in nakuha naman han veggies with egg lumpia nga putahe ni Marissa Aberia tikang ha bungto han Maydolong.
Ngatanan nga nagdaog in nagkarawat hin cash ngan mga higamit ha kusina. An kampyon in magseserbi nga representante han probinsya ha regional level, ngan posible liwat nga makalaban ha national level kun magdadaog. (JDM)
