Nagpapadayon an paghatag han Eupagrow foliar fertilizer ha munisipyo han Sulat yana nga aga, Enero 9, 2025, kun diin 166 nga parag-uma an napili nga makakarawat hini nga bulig tikang ha Provincial Government of Eastern Samar. An aktibidad ginpangulohan ni Governor Ralph Vincent “RV” Evardone upod an Office of the Provincial Agricultural Services nga gindudumara ni Provincial Agriculturist Virlin Capon.
Ha iya mensahe, ginpahayag ni Gov. Evardone nga padayon an gobyerno probinsyal ha paghatag hin konkretong suporta para mapakusog an produksyon han agrikultura ngan masiguro an kauswagan han panginabuhi han mga parag-uma ha probinsya.
An Eupagrow usa nga organic foliar fertilizer nga igin-aaplikar pinaagi han pag-spray direkta ha dahon han tanom, labi na ha humay, para mas mapahusay an pagtubo ngan ani. Kaupod han distribusyon han fertilizer, igin-turn over gihapon an dose (12) nga knapsack sprayer ha nagkakalain-lain nga farmers’ organizations ngan grupo hin parag-uma ha Sulat, sugad nga dugang nga kagamitan ha ira uma.
