Maabot 290 ka-indibidwal tikang ha 37 nga household o 85 ka pamilya an nakatagamtam hin magkalain-lain nga libre nga serbisyo nga iginhatag han gobyerno probinsyal, ha pangunguna ni Gov. RV Evardone, ngadto ha pipira nga tay-aw nga barangay han bungto han General McArthur, lakip na an Brgy. Tandang Sora.
Lakip han mga iginpahimtang nga serbisyo an libre nga konsultasyon o check-up tikang ha Rural Health Unit, Eastern Samar Provicial Hospital, Provincial Health Office, dental services ngan libre nga turi.
Ginbuligan gihapon an mga residente ha pag-asikaso hin importante nga mga dokumento sugad han PhilHealth, samtang an Assessor’s Office in naghatag hin impormasyon ngan iba pa nga bulig para ha mga katunaan.
Ginpanhatag liwat an libre nga medisina para ha katawhan ngan ha ira kahayupan, samtang an Office of the Provincial Agriculttural Services in nagdistribwer hin libre nga mga taramnon.
An 85 nga pamilya in nakakarawat gihapon hin medical kits.
Ini nga SeRVisyo Caravan in kabahin han padayon nga paningkamot han probinsya nga pamunuan ha ilarom han mandato nga maipahirani an mga serbisyo publiko ngadto ha mga katawhan — kay ha aton probinsya, tawo iton una. (TAC-JDM)
