Ginpangunahan ni Association of Barangay Councils President Board Member Stella Libanan, upod hira BM Timmy Campomanes, BM Evet Bandoy-Gaylon ngan BM Nestonette Cablao, an usa nga komite hearing han Nobyembre 17, 2025, bahin han ordinansa nga “An Enabling Ordinance Adopting Republic Act No. 9482, The Anti-Rabies Act of 2007” ngan an mga giya para han husto nga pag-implementar hini ha bug-os nga probinsya han Eastern Samar.
An nasabi nga committee hearing in kabahin han padayon nga paningkamot han probinsya ha pagsuporta han nasyonal nga mga inisyatibo kontra rabies.
Tungod han padayon nga peligro nga dulot han rabies, mayda urgente nga kinahanglanon nga maghimo hin localized nga mga polisiya ngan pitad nga magpapabuhi han mga probisyon han RA 9482 — labi na an mass vaccination program, responsible pet ownership, ngan aktibo nga partisipasyon han tagsa barangay.
Ginklaro han komite nga an gobyerno probinsyal in komitado paghatag hin mas protektado, ngan rabies-free nga lugar para ha ngatanan.
Ini in pinaagi han kusog nga pakig-alayon han LGUs, veterinary offices, barangay officials, pet owners, ngan iba pa nga stakeholders.
Padayon an panawagan han probinsya nga magin responsable an tagsa tag-iya hin sapat, magpa-booster o magpabakuna han ira mga ayam, ngan tumabang ha paglikay han paglarab han rabies ha entero nga probinsya. (KDA-JDM)
