Sakob hini nga programa, 25 nga kwalipikado nga lokal nga parag-uma nga may gin-uuma nga di malapos hin duha ka ektarya an napili nga mag-aagi hin tulo kaadlaw nga training nga may katuyuanan nga maghatag hin teoretikal nga instruksyon ngan praktikal o hands-on nga demonstrasyon han magkadirudilain nga abanse nga pamaagi ha pagtanom hin humay ngan mga buhat ha pagdumara han uma.
An Balangkayan in usa han duha nga bungto han Eastern Samar nga napili para han programa.
Ini nga programa in estratehiko nga ginbuhat ha Balangkayan, usa nga munisipyo nga mayda ikatulo nga pinakadako nga katunaan nga gin-uuma hin humay ha probinsya.
Apisar han kahaluag han nauuma nga katunaan, an Balangkayan in diri pa gihapon ginkikilala kumo “rice granary of the south” tungod han habubo nga resulta han produksyon.
Basar kan Provincial Rice Program Coordinator Teodoro Apura, ini nga training in may katuyuanan nga ma-edukar an mga parag-uma han mga makabag-o nga teknolohiya ngan epektibo nga pamaagi hin pag-uma kumo kaparte han mga pitad nga ginbubuhat pagkab-ot han agriculture development and food security nga usa han five-point agenda ni Gov. RV Evardone.
Nagpasalamat naman hi Vice Mayor Edith Anne Contado, representante ni Mayor Allan Contado, kan Gov. Evardone ngan han gobyerno probinsyal han iya suporta han mga parag-uma.
Dida han iya mensahe, iya liwat ginrekognisar an importante nga papel han mga parag-uma ha komunidad, nga hira an nagpapasiguro han suplay han pagkaon han bug-os nga munisipyo
