Manilampuson nga gindumara an opening ceremony han Technical Education and Skills Development Authority (TESDA) Eastern Samar an 2026 Worldskills Provincial Skills Competition yana nga adlaw, Marso 18, ha Balangiga National Agricultural School.
An nasabi nga kompetisyon, nga pagbubuhaton hin duha ka adlaw tikang Marso 18 tubtob Marso 19, in gintambongan hin maabot 150 nga partisipante tikang ha magkalain-lain nga mga eskwelahan ngan training centers ha bug-os nga probinsya nga naghahatag hin skills training programs.
Lakip han mga partisipante an PTC-Eastern Samar, Arteche National Agricultural School, Balangiga National Agricultural School, Samar National School of Arts and Trades, Don Bosco Training Center Borongan, Balangkayan National High School, Dolores National High School, Eastern Samar National Comprehensive High School, Lalawigan National High School, ngan Goshen Farm.
Naghatag naman hin mensahi hi Gov. RV Evardone nga bug-os an suporta han gobyerno probinsyal ha mga programa han TESDA, nga iya nakikita nga maupay nga alternatibo para ha mga Estehanon nga karuyag magkamay-ada hin praktikal nga kahibabroan ngan maghahatag hin maupay nga direksyon para ha mga TESDA certificate holders.
Dugang pa, ginlalauman an pagtukod hin TESDA building ha kapitolyo yana nga tuig basi mas mapakusog pa an serbisyo han ahensya ha probinsya, ngan iya iginpahimatngon nga may-ada ginbubuo nga policy framework para ha dugang nga scholarship programs.
Presente ha opening ceremony hira Gov. Evardone, Balangiga Vice Mayor Arnel Calisay, TESDA Regional Director Dan M. Navarro, TESDA Provincial Director Dr. Antonio C. Waniwan, ngan mga TESDA administrators. (TAC-GBP-ARV)
