Ha sumpayan han Eastern Samar Provincial Veterinary Office ha pangunguna ni Dr. Melanie Costuna-Osita, Office of the Municipal Agricultural Services ngan MLGU han Dolores ha pangunguna ni Dolores Municipal Mayor Zaldy Carperso, gintagan hin kadagmitan nga aksyon an nahipatik nga pagkamatay hin pira nga mga karabaw ha Brgy. Hinulaso, Dolores.
Subay kan Dr. Osita, an Provincial Veterinary Office diretso nagpailarum hin disease investigation ngan nag-request hin sampling ha Regional Animal Disease Diagnostic Laboratory agud hibaruan an naging kawsa han pagpatay han pira nga mga karabaw.
Ha resulta ha mga eksaminasyon, kinita nga positibo han fasciola o mas kilala ha lokal nga tawag nga “hilas” o liver flukes an nasabi nga hayop.
An karabaw nga positibo hini nga sakit in makikitaan hin mga simtomas sugad han diarrhea, waray gana ha pagkaon, anemia nga nagiging kawsa hin pagkamatay kun dire maaagapan sugad han pagpurga.
Kataliwan hini, naging mahinungdanon ngan mahugot an pakipag-iristorya ngada ha mga komunidad mahi-unong han sakit han karabaw nga hilas nga di angay kahadlokan ngan gintagan hin duon nga waraon na an mentalidad han dire pagpatambal han mga ataman nga kakarabwan nga nagiging kawsa han dire kawara han sakit.
Usa pa nga naging aktibidad an pamurga ngan paghatag hin libre nga mga bitamina para han kakarabwan ngan mahugot nga ginduduso an artificial insemination o AI para mas humataas pa an produksyon o mapadamo pa an mga ataman nga karabaw.
Para han mga Estehanon nga intresado pahimulusan an libre nga purga, bitamina ngan artificial insemination para ha mga carabao, dire la mag-alang pumakadto ha pinakaharani nga Office of the Municipal Agricultural Services o makipagsumpayan mismo ha Provincial Veterinary Office. (JDM)
