Nagka-urosa an mga miyembro han Provincial Peace and Order Council, Provincial Task Force to End Local Communist Armed Conflict, ngan Provincial Anti-Drug Abuse Council para han second quarter council meeting nga ginpangunahan ni Provincial Planning and Development Officer Joselito Abrogar, dida han Hunyo 29, 2026 ha PGO Conference Hall.
Usa han importante nga ginhisgutan amo an mga pamaagi agud malikayan an hinabo han insidente han pamumusil han estudyante ha sulod han eskwelahan sugad han nahitabo ha San Jose National High School ha Leyte.
Kasumpay hini, naging pitad an pagtukod hin compositing team nga igprepresentar kan Gov. RV Evardone para hin Executive Order nga kinukomponer han law enforcement, prosecutor’s office, corrections, PSWDO, ngan mga religious organizations agud mas episyente nga matutukan an paglikay han krimen ngan paghatag hin koordinasyon ngan aksyon ha mga komunidad.
Sakop han inisyatibo an mga programa kontra-droga, kontra-insurhensya, denormalization, ngan anti-crime operations.
Samtang, ginkalipay nga an crime incidents ha Sinirangan Samar ha mga bulan han Abril ngan Mayo in dako an paghabobo subay han monitoring han Eastern Samar Provincial Police Office.
Ha presentasyon naman ni Lt. Col. Ricky James Rosalejos han Philippine Army, iya gin dadasig nga an probinsya han Sinirangan Samar in aada na ha ilarum han stable internal peace and security condition o SIPSC, pero iya gintagan hin duon nga diri ini rason para umundang an padayon nga pagparig-on han kamurayaw.
Gin-aghat liwat ni 802nd Community Defense Center Director Maj. Bethuel N. Barbel an pag-accounting ngan panrehistro han Standby and Ready Reserve agud madugangan an kapasidad han probinsya ha pagmentinar han seguridad, rescue operations, disaster response, ngan iba pa nga emerhensya.
Ini an resulta ha mas mahugot nga koordinasyon, pagbinubligay para ha kamurayaw ngan seguridad ha Sinirangan Samar. (JDM-FCL)
