Parte han ika-60 nga anibersaryo han probinsya, an gobyerno probinsyal han Sinirangan Samar, ha kolaborasyon han Provincial Youth Development Council, ha panguna ni SK Federation President ngan PYDC Chairman, Board Member Miles Tiu, in malampuson nga nagdumara hin Youth Summit 2025 Disaster Preparedness and Resilience kakulop, Nobyembre 7.
Gindumara an aktibidad ha Saint Mary’s College ha syudad han Borongan, ngan may panuyo nga makapagpaangbit hin mga hibaro ha mga batan-on parte ha disaster preparedness ngan emergency response nga dara han mga kalamidad.
An nasabi nga summit in gin atenderan hin 177 nga mga estudyante nga nagtikang ha magkalain-lain nga bungto han probinsya, sugad han San Julian, Maydolong, Sulat, Balangkayan, ngan an mga estudyante tikang ha Saint Mary’s College.
Kabakyang hini an mga ahensya han gobyerno sugad han Provincial Social Welfare and Development Office, Provincial Disaster Risk Reduction and Management Office, Provincial Health Office (PHO), Department of Science and Technology, ngan Department of the Interior and Local Government.
Sakob han youth summit, gintutukan an magkalain-lain nga aspeto han disaster management sugad han disaster preparedness ngan disaster response katapos han kalamidad.
Usa gihapon ha pinaka-importante nga bahin han summit amo an lecture parte han Basic Life Support nga iginhatag ni Mark Greg Rodriguez han PHO, nga nagtutdo han tama nga hands-only CPR para ha mga hamtong, bata, ngan masuso.
Nagdistribwer liwat hin 150 nga Go Bags ngadto ha mga estudyante. Ini nga mga Go Bags in may sulod nga first aid necessities sugad han alcohol, sabon, band aid, face masks ngan surgical gloves, nga usa nga praktikal nga bulig para ha pag-andam han kada usa. (SEJ-KDA)
