Agud atubangon an gin-aantos nga krisis ha presyo han gasolina, gin-anunsyo ni Arteche Vice Mayor Roland Boie Evardone pina-agi han iya Facebook post nga may-ada na programa an local government unit han Arteche.
Yana nga adlaw, Abril 10, gindudumara an distribusyon han vouchers ha ilarom han inisyal nga implementasyon han TGIF o Toda Gas Incentive Fund Program nga nabalor hin ₱1,000.
An mga rehistrado ngan lehitimo nga mga driver makakakarawat hin tag lima nga voucher nga nagkakantidad hin ₱200 kada usa.
Sumala han lokal nga pamunuan, ini nga pitad gindesisyonan agud masiguro nga matutuman an katuyoan han programa nga makabulig ha panginabuhi han mga driver.
Hapagkayana, nagpapadayon an panlista para han mga habal-habal driver, bote operator, ngan mga rehistrado nga fishing boat operators nga makakabenepisyo han fuel subsidy nga ipanhahatag ha ira. (TAC)
