Ha pormal nga seremonya hin ribbon cutting, opisyal nga ginbuksan an Tourism ngan Agri-Trade Fair ha Capitol Grounds, nga nagserbe nga pagsugod han mga kalihokan para han 60th founding anniversary han Eastern Samar.
An nasabi nga aktibidad in gin-implementar pinaagi han kooperasyon han Office of the Provincial Agricultural Services, Department of Trade and Industry, ngan Provincial Tourism Office, nga may-ada tuyo nga ipakita an mga abilidad, produkto, ngan kultura han mga Estehanon.
Upod ha seremonya an pipira nga mga miyembro han Sangguniang Panlalawigan sugad kanda Board Member Jun Quelitano, BM Timmy Campomanes, ngan BM Atty. PJ Evardone nga naghatag han iya welcome message ha ngaran ni Gov. RV Evardone.
Ginpasidunggan naman an nasabi nga aktibidad han presensya ni Grace Evardone, nga naghatag inspirasyon ha mga partisipante ngan mga bisita pinaagi han iya suporta ha mga inisyatibo nga nagpapasiguro han pag-uswag han lokal nga turismo ngan agrikultura.
Presente gihapon hira Provincial Agriculturist Virgil Capon ngan Provincial Administrator Nelson Cortez nga nagpaabot han ira suporta ha mga partisipante ngan exhibitor.
Partisipante han nasabi nga trade fair an mga MSMEs (micro, small and medium enterprises exhibitors nga tikang ha mga LGUs han Maydolong, Lawaan, San Julian, Can-avid, Llorente, Salcedo, Hernani, Guiuan, Arteche, Balangkayan, San Policarpo, Taft ngan syudad han Borongan nga nagpasundayag han ira mga lokal nga produkto, ngan pagkaon, nga karuyag pasidunggan ngan ipasabot ha publiko.
Ginbisita liwat an nasabi nga Agri-Trade Fair ni Francisco Rosaroso, chief of agribusiness and marketing assistance division Region 8, nga nagpahayag han iya pagtagusya han inisyatiba han gobyerno probinsyal ha paghatag hin oportunidad ha mga MSME exhibitors nga maipakita an ira produkto.
An Tourism and Agri-Trade Fair in magpapadayon tikang November 6 tubtob 8, 2025 nga maghahatag hin higayon ha publiko nga makita, mapalit, ngan masuportahan an mga produkto tikang ha iba-iba nga bungto ngan siyahan nga syudad han Sinirangan Samar. (KDA-JDM)
