Nagpa-abot hin pasasalamat hi Erlinda Logronio, 67-anyos nga parag-uma tikang ha Brgy. Cag-olango, Balangiga, Eastern Samar, han iya nakarawat nga bulig pinansyal nga nakantidad hin Php 7,000 pinaagi han Rice Competitiveness Enhancement Fund – Rice Farmers Financial Assistance (RCEF-RFFA).
Sobra duha ka dekada na nga nag-uuma hi Nanay Erlinda kaupod an iya asawa. Ha iya pag-uuma hin humay, gaway, kamote, ngan saging, nasustentuhan niya an iya napulo nga mga anak.
Sumala ha iya, nakakakuha hiya hin tubtob 30 sako nga humay kon maupay an panahon ngan an ani.
Ini nga humay in nagseserbi nga pagkaon para kan Nanay Erlinda ngan han iya napulo nga mga anak kaupod an ira tagsa tagsa nga pamilya, pero subay ha iya may mga panahon nga dire ine nagigin supisyente.
Siring ni Nanay Erlinda, dako liwat nga problema para ha ira an agsub nga pag-abot han mga bagyo ngan mga peste nga nagpapakuri han ira tanum, ngan an baha nga nakakaguba han ira mga produkto, sugad nala han naglabay nga raot daot han panahon nga nakahibang han ira mga tanom nga utanon.
Tungod hini, para kan Nanay Erlinda dako gud nga bulig an suporta tikang ha gobyerno.
“Salamat nga dako kan Gobernador han iya pagbulig ha amon nga mga parag-uma,” dugang pa niya.
Subay ha iya, iya gagamiton an nakarawat nga bulig pinansyal para pumalit hin gahi, fertilizer, ngan igtaranom nga gulay.
An programa nga RCEF in naglalayon mabuligan an mga parag-uma pinaagi han makinarya, de-kalidad nga liso, ngan pautang. Agud mas magin matatag an ira pangabuhi bisan pa han mga kalamidad ngan peste. (SEJ-JDM)
