Ginkomemorar han Marso 17, 2025 an ika-504 nga anibersaryo han pag-abot ni Magellan ha Pilipinas ngan han una nga pakighimangraw han mga Pilipino ngan Kastila pinaagi hin usa nga programa ha Magellan’s Landing Site, Brgy. Pagbabangnan, Homonhon, Guiuan.
Pinangunahan ini nga aktibidad ni Philippine Councilors League (PCL) Region 8 President ngan Board Member RV Evardone, upod an mga opisyal han probinsya, bungto, ngan kabarangayan.
An selebrasyon ginbuhat ha atubangan han Homonhon Quincentennial Marker, usa nga tigaman nga nagpapakita han kamahinungdanon han nahitabo han isla dida han Marso 1521.
Ha kasaysayan, an Homonhon syahan nga dinaungan han ekspedisyon ni Ferdinand Magellan, upod an iya tulo nga sakayan—Trinidad, Concepción, ngan Victoria—kahuman han halaba nga pagbiyahe ha Dagat Pasipiko.
Nagpabilin ha Homonhon an grupo ni Magellan hin walo ka adlaw, tikang han Marso 17 tubtob Marso 25, 1521.
Dida hini nga panahon, nagtikang an relasyon han mga Pilipino ngan mga taga-Europa, nga nagresulta han pagsarang han Kristiyanismo ha Pilipinas.
An padayon nga pagselebrar han anibersaryo han Magellan Landing in nagpapakita han importante nga papel han Homonhon ha kasaysayan han Pilipinas.
Padayon nga nagpapabilin an isla nga usa han importante nga makasaysayan nga lugar, buhi nga pamatuod han syahan nga pakighimangraw han aton mga ninuno ngan han mga taga-Europa.
Nagpapadayon naman an paningkamot han lokal nga gobyerno ha pagpabakod han turismo ngan pagpreserba han kultura ngan kasaysayan han isla, basi masiguro nga magpapabilin an dako nga papel han Homonhon ha kasaysayan han Pilipinas. (TAC-GBP)
