Opisyal nga gin-abrihan an Eastern Samar Provincial Athletic Meet o ESPAAM han Domingo, Pebrero 8, 2026 ha Brgy. 01 Plaza, Balangkayan, Eastern Samar.
An aktibidad in madalagan kutob Pebrero 11, 2026, ngan magdadasig hin iba iba nga kompetisyon ha sports sugad han basketball, volleyball, swimming, archery, boxing, gymnastics, ngan iba pa.
Ini in gin-partisiparan hin 1,909 nga athleta kun diin 454 nga atleta in tikang ha Unit I Green Raptors, 500 tikang ha Unit II Blue Sharks, 455 han Unit III Red Spartans, ngan 500 naman tikang ha delegasyon han Unit IV Black Panther.
Ha iya mensahe han suporta, gintagan duon ni Gov. RV Evardone an papel han sports dire la pagpa-ursa han physical strength, pero ha pagdevelop liwat han disiplina ngan teamwork han kabataan. Iya liwat ginpahinumdom an pagpapadayon apisar han mga aagian nga kapirdihan han usa nga atleta nga pagpadayon han pagkakamayda hin “humility in triumph.”
Presente liwat an nasabi nga aktibidad hira Eastern Samar Congressman Christopher Sheen Gonzales, Vice Governor Maricar Sison-Goteesan, kaupod an mga board members han 1st ngan 2nd Districts, mga municipal mayors, ngan DepEd R8 OIC Regional Director ngan concurrent OIC Eastern Samar Schools Division Superintendent Ronelo Al Firmo. (SEJ-RCS-ACV)
