Pormal nga gintikangan an ika-unom nga season han Eastern Samar Basketball and Volleyball League (ESBVL) yana nga adlaw, Enero 31, 2026 ha Capitol Gym, Borongan City.
Ini in pinaagi han gindumara nga grand opening ceremony nga nagtampok kan Abtik Sulat ngan Alas Pilipinas Under-16 member Nadeth Herbon kumo torchbearer.
Kalakip han panuyo nga ipakita an kakarit han mga kabataan ngan magduso han kampanya nga “Bola Kontra Droga,” gintagan hin duon ni Gov. RV Evardone an importansya han ESBVL ha hingyap nga makapagproduser pa hin damu nga mga Estehanon nga atleta para ha national sporting scene.
Para makab-ot ini, nag-imbitar an gobernador hin mga scouts para mag-obserbar han mga atleta ngan magsirbe nga tulay para makilala an talento han mga batan-on nga atleta ha probinsya agud makakuha hin athletic scholarships ngan makasulod ha mga de-kalidad nga collegiate programs ha Manila ngan Cebu.
Ha kabug-usan, an ESBVL Season 6 in ginpartisiparan hin mga atleta nga ginkokomponir hin 23 nga teams ha basketball ngan 22 naman ha volleyball tikang ha magkadirudilain nga bungto han probinsya. (SEJ-GBP)
