Ginbuhat an opisyal nga turnover han Department of Agriculture (DA) Region 8 an upat nga upgraded Brahman nga baka ha probinsya. Ini in kinarawat ni Gov. RV Evardone, kaupod an representante han Provincial Veterinary Office, hi Dr. Melanie Osita, nga ginbuhat ha Provincial Breeding Station ha Can-avid, Miyerkules nga adaw, Marso 25, 2026.
An upat nga baka in iginhatag han DA Region 8 kabahin han ira programa ha pagpauswag han livestock industry ngan pag-upgrade han kalidad han mga baka ha probinsya.
Sumala han mga tinaglawas han DA, an donasyon in nagtutuyo nga magin pangunahin nga breeding source an probinsya agud madugangan an produksyon han baka ngan mabuligan an panginabuhi han mga parag-uma.
Ginkomitir naman ni Gov. Evardone an pag-develop han mga pasilidad ha nasabi nga breeding station agud mas magin episyente ngan epektibo an operasyon han istasyon.
Presente ha nasabi nga turnover ceremony an mga tinaglawas han Provincial Veterinary Office ngan an mga representante han DA Region 8. (TAC-GBP)
