Ha pagpadayon han selebrasyon han ika-60 nga anibersaryo han pagtindog han probinsya han Sinirangan Samar, an gobyerno probinsyal ha liderato ni Gov. RV Evardone in nagdara hin mga kinahanglanon nga serbisyo ha komunidad han Sitio Inu-ulanguhan, Brgy. Roxas, usa han tay-aw nga lugar han General MacArthur, dida han gindumara nga SeRVisyo Caravan han nakalabay nga Biyernes, Nobyembre 14, 2025.
Hi Antonio Pagala, an punong barangay han Sitio Inu-ulanguhan, in nagpahayag naman han iya dako nga pasasalamat kan Gov. Evardone para hini nga programa.
Sumala ha iya, kasagaran han mga residente in nasakay hin habal-habal para makakuha hin importante nga serbisyo tikang ha gobyerno, ngan nagasto hin tubtob ₱300 para la han balikan nga pamasahe.
Dugang pa, an komunikasyon in dako liwat nga problema, labi na kun mayda emerhensya sugad han pagtawag hin ambulansya, tungod han kawara hin masasarigan nga internet connection ha ira lugar.
Tungod hini nga mga kakurian, nagpasalamat hi Pagala han gobyerno probinsyal ha ira pag-abi-abi han bulig apisar han kahirayo ngan kaguti han residente nga naukoy han ira sitio.
An SeRVisyo Caravan nga gindumara in naghatag hin dako nga bulig ha 343 nga residente han sitio, kun diin nakakarawat hira hin libre nga serbisyo tikang ha magkalain-lain nga ahensya han gobyerno.
Kaapi hini nga mga serbisyo an libre nga medisina, pagturi, legal counseling, binhi (seeds), ngan pangiho (dental services), lakip na an iba pa.
Labot pa, an gobyerno probinsyal, ha pakikipagsumpayan kan Cong. Sheen Gonzales ngan han Department of Information and Communications Technology, in magbubutang liwat hin libre nga Wi-Fi connection ha lugar para mapauswag ngan mapadali an komunikasyon han komunidad. (SEJ-GBP/JDM)
