Padayon an gobyerno probinsyal han iya paningkamot nga maihatag an direkta nga serbisyo publiko ngadto ha mga tay-aw nga lugar pinaagi han SeRVisyo Caravan nga manilampuson nga gindumara parte han 60th founding anniversary han probinsya dida han Nobyembre 14, 2025.
Gindumara an aktibidad pinaagi han kooperasyon han magkadirudilain nga ahensya han gobyerno sugad han Department of Agrarian Reform, Provincial Veterinary Office, Provincial Engineering Office, Philippine National Police, Office of the Provincial Agriculturist, PASSO, Provincial Social Welfare and Development Office, Registry of Deeds, Provincial Health Office, Department of Health, Eastern Samar Provincial Hospital, upod pa an dental ngan circumcision services para maghatag hin libre nga serbisyo ha mga tawo.
Personal nga binisita hi Gov. RV Evardone, upod hira Vice Gov. Maricar Sison-Goteesan pati na liwat hira Board Member Christel Yadao, BM Evet Bandoy-Gaylon, BM Nestonette Cablao, PCL President BM Irven Pormeda, BM Stella Libanan, BM Pol Gonzales ngan Provincial Administrator Nelson Cortez.
Ha Brgy. Quezon, nga may 71 households, 119 families, ngan usa ka populasyon nga 327, personal nga gin-abot han mga opisyal ngan frontline workers an mga residente agud maghatag hin libre nga konsultasyon medikal, dental services, bulig pang-agraryo, impormasyon pan-negosyo, dokumentasyon, social services, ngan iba pa nga panginahanglanon.
Sumala han provincial government, an SeRVisyo Caravan in nagpapakita han ira padayon nga dedikasyon nga makaabot bisan ha pinaka-hirayo nga lugar agud masiguro nga an tagsa nga Eastern Samareño in nakakakarawat han serbisyo nga angay para ha ira.
Padayon an probinsya ha pagtikang han mga susunod nga caravan nga magpapadayon tubtob matapos an selebrasyon han ika-60 anyos nga pagkakatukod han Eastern Samar.
